Allir kjarasamningar rafiðnaðarmanna eru gerðir af RSÍ fyrir hönd aðildarfélaga, sambandið er með yfir 20 kjarasamninga við vinnuveitendur auk nokkurra vinnustaðasamninga.

Kauptaxtar eru reiknaðir út af skrifstofunni og sendir út til félagsmanna þegar breytingar verða á þeim, þeirri útgáfu hafa ætíð fylgt margskonar aðrar upplýsingar um kjarasamningana. Kjarasamningar rafiðnaðarmanna eru nokkuð misjafnir eftir því hvar unnið er, helst vegna ýmiskonar staðbundinna réttinda eða framleiðslubónusa tengdum vinnustaðnum. Kjarasamningar fjalla um margt fleira en einungis um laun. Mennta-, orlofs-, trygginga-, vísitölu-, vaxta- og lánamál koma til umfjöllunar þegar sest er að samningum með vinnuveitendum og stundum ríkisvaldi. Í sumum tilfellum eru þeir það flóknir að til samningagerðarinnar þarf sérfræðinga t.d. hagfræðinga og lögfræðinga, sú þjónusta

er sótt til ASÍ og Kjararannsóknarnefndar. Uppsagnarfrestur rafiðnaðarmanna er nokkuð misjafn eftir því á hvaða samning þeir vinna, en lágmarksuppsagnarfrestur er einn mánuður. Eftir 3 ár hjá sama vinnuveitanda 2 mánuðir og eftir 5 ár hjá sama vinnuveitanda 3 mánuðir. Sami uppsagnartími gildir ef breyta á kjörum starfsmanns. Segja verður upp skriflega, hvort sem um er að ræða uppsögn úr starfi eða á kjörum, og er uppsagnartíminn talinn frá næstu mánaðarmótum eftir uppsögn.

Rétt er að benda á að uppsagnartími er jafngildur hvort sem launþegi eða vinnuveitandi segir upp.

RSÍ og LÍR hafa gert samning um að alla vinnu við nýlagnir skuli vinna í ákvæðisvinnu. Félögin standa að rekstri Ákvæðisvinnustofu Rafiðna sem sér um uppgjör á verkum unnum samkvæmt ákvæðistaxtanum. Ákvæðistaxtinn hefur skilað töluverðum bónus til rafiðnaðarmanna í gegnum árin, auk þess að verkkaupar hafa með notkun taxtans góða tryggingu fyrir verði og gæðum raflagnarinnar.